ഗ്ലോബൽ എൻ.സി.എ.പി ക്രാഷ്ടെസ്റ്റിൽ നിറംമങ്ങി മാരുതി കാറുകൾ. പുതിയ ടെസ്റ്റ് പ്രോട്ടോക്കോളുകൾക്ക് കീഴിലാണ് ക്രാഷ് ടെസ്റ്റ് നടത്തിയത്. മാരുതിയുടെ സ്വിഫ്റ്റ്, ഇഗ്നിസ്, എസ്-പ്രസ്സോ എന്നീ വാഹനങ്ങളാണ് ടെസ്റ്റിൽ പങ്കെടുത്തത്. അതേസമയം മഹീന്ദ്രയുടെ സ്കോർപ്പിയോ എൻ ക്രാഷ്ടെസ്റ്റിൽ അഞ്ച് സ്റ്റാറുകൾ നേടി.
പുതിയ ക്രാഷ് ടെസ്റ്റ് പ്രോട്ടോക്കോളുകൾ അനുസരിച്ചുള്ള രണ്ടമത്തെ സെറ്റ് ഫലങ്ങൾ ഗ്ലോബൽ ന്യൂ കാർ അസസ്മെന്റ് പ്രോഗ്രാം (ഗ്ലോബൽ എൻ.സി.എ.പി) തിങ്കളാഴ്ചയാണ് പ്രഖ്യാപിച്ചത്. ടെസ്റ്റ് ഫലങ്ങളിൽ മാരുതി സുസുകിയുടെ മൂന്ന് മോഡലുകളും ഉൾപ്പെടുന്നു. സ്വിഫ്റ്റ്, എസ്-പ്രസ്സോ, ഇഗ്നിസ് എന്നിവയുടെ, മുൻവശത്തെ രണ്ട് എയർബാഗുകളും എ.ബി.എസും ഉൾപ്പടെവരുന്ന അടിസ്ഥാന മോഡലുകളാണ് പരീക്ഷിക്കപ്പെട്ടത്.
മൂന്ന് മോഡലുകളും ക്രാഷ് ടെസ്റ്റുകളിൽ മോശം പ്രകടനമാണ് കാഴ്ചവെച്ചതെന്ന് എൻ.സി.എ.പി അധികൃതർ പറയുന്നു. മുതിർന്ന യാത്രക്കാരുടെ സുരക്ഷാ വിഭാഗത്തിൽ ഓരോ സ്റ്റാർ വീതമാണ് മൂന്ന് വാഹനങ്ങളും സ്കോർ ചെയ്തത്. ചൈൽഡ് ഒക്യുപന്റ് പ്രൊട്ടക്ഷൻ വിഭാഗത്തിൽ സ്വിഫ്റ്റ് ഒരു സ്റ്റാർ നേടിയപ്പോൾ ഇഗ്നിസും എസ്-പ്രസ്സോയും സീറോ സ്റ്റാറിൽ ഒതുങ്ങി.