ലോകത്തിലെ തന്നെ ഏറ്റവും ഉയരം കൂടിയ തേയിലത്തോട്ടങ്ങളാണ് ഇവിടെയുള്ളത്. ഉയര്‍ന്ന പ്രദേശമായതിനാല്‍ ഇവിടെ വളരുന്ന തേയിലയ്ക്ക് പ്രകൃതി കനിഞ്ഞു നല്‍കിയ ഒരു പ്രത്യേക രുചിയും മണവും ഉണ്ട്._
_ഉയരം കൂടും തോറും ചായക്ക് രുചിയും കൂടുമെന്ന് പരസ്യവാചകം കേട്ടിട്ടില്ലേ? അത് നമ്മുക്കൊന്ന് പരീക്ഷിച്ചാലോ.. അതായത്, ലോകത്തിലെ ഏറ്റവും ഉയരം കൂടിയ തേയിലത്തോട്ടത്തില്‍ പോയി ഒരു ചായ കുടിച്ചാലോ? അധികം ദൂരമൊന്നുമില്ലന്നേ, നമ്മള് മലയാളികള്‍ക്ക് അടുത്തുള്ള ഒരു പ്രദേശമാണ്. ഇപ്പോള്‍ ഒരു അത്ഭുതവും അമ്പരപ്പും ഒക്കെ തോന്നുന്നുണ്ടല്ലേ.. എന്നാല്‍ നിങ്ങളുടെ ക്യൂരിയോസിറ്റി അധികം കൂട്ടുന്നില്ല, മൂന്നാറിനടുത്തുള്ള കൊളുക്കുമലയെ കുറിച്ചാണ് ഈ പറഞ്ഞുവരുന്നത്. കേരളത്തിലല്ലെങ്കിലും, നമ്മുടെ വളരെ തൊട്ടുത്ത് തന്നെയുള്ള തമിഴ്‌നാട്ടിലെ ഒരു ഹില്‍ സ്‌റ്റേഷനാണ് ഈ പ്രദേശം._
_തേനി ജില്ലയിലെ ബോഡിനായ്ക്കനൂര്‍ താലൂക്കിലെ ഒരു കുഗ്രാമമാണ് കൊളുക്കുമല. ലോകത്തിലെ തന്നെ ഏറ്റവും ഉയരം കൂടിയ തേയിലത്തോട്ടങ്ങളാണ് ഇവിടെയുള്ളത്. ഉയര്‍ന്ന പ്രദേശമായതിനാല്‍ ഇവിടെ വളരുന്ന തേയിലയ്ക്ക് പ്രകൃതി കനിഞ്ഞു നല്‍കിയ ഒരു പ്രത്യേക രുചിയും മണവും ഉണ്ട്. മാത്രമല്ല ഇവിടുത്തെ ആളുകള്‍ ഇപ്പോഴും ഇവിടെ പരമ്പരാഗത രീതിയിലാണ് തേയില തയ്യാറാക്കുന്നത്. അതുക്കൊണ്ട് തന്നെ കൊളുക്കുമലയിലെ തേയിലയുടെ സവിശേഷമായ രുചി നഷ്ടപ്പെടാത്തെ തന്നെ കിട്ടും._
_കൊളുക്കുമലയില്‍ നിന്നാല്‍ ദൂരെയുള്ള മലനിരകള്‍ കോടമഞ്ഞില്‍ നിന്ന് മറയുന്ന കാഴ്ചകള്‍ ഏവരുടെയും മനംകവരുന്ന ദൃശ്യങ്ങളാണ്. സമുദ്രനിരപ്പില്‍ നിന്ന് ശരാശരി 7,130 അടി (2,170 മീറ്റര്‍) ഉയരത്തിലാണ് ഈ പ്രദേശം സ്ഥിതി ചെയ്യുന്നത്. മൂന്നാറില്‍ നിന്ന് ഏകദേശം 32 കിലോമീറ്റര്‍ അകലെയാണ് കൊളുക്കുമല. 17 കിലോമീറ്ററോളം വരുന്ന ഈ പാത, ദുര്‍ഘടവും എപ്പോഴും മഴ പെയ്ത് ഈര്‍പ്പം നിറഞ്ഞുകിടക്കുന്നതുമായ റോഡുകള്‍ കാരണം മലമുകളിലുള്ള ഈ ഗ്രാമത്തിലേക്ക് ജീപ്പില്‍ മാത്രമേ എത്തിച്ചേരാനാകൂ._
_പരന്നുകിടക്കുന്ന തേയില തോട്ടങ്ങളും ഒരു പഴയ തേയില ഫാക്ടറിയുമുള്ള ഈ പ്രദേശം ഇന്നും ഒരു പഴയ ലോകമാണ്. 1930-കളില്‍ പണിത ഇരുനില കെട്ടിടമാണ് തേയില ഫാക്ടറി. കോട്ടഗുഡി പ്ലാന്റേഷന്‍ ആണ് ഇപ്പോള്‍ അതിന്റെ ഉടമസ്ഥര്‍. ഇതിനുള്ളില്‍ സന്ദര്‍ശിക്കാന്‍ സാധിക്കും. തടികൊണ്ടുള്ള അകത്തളങ്ങളില്‍ തേയിലയുടെ സൗരഭ്യം എപ്പോഴും നിറഞ്ഞുനില്‍ക്കുന്നുണ്ടാവും. തേയില സംസ്‌കരണത്തിന്റെ ചില ഘട്ടങ്ങള്‍ നിങ്ങള്‍ക്ക് ഇവിടെ കാണാം. പരമ്പരാഗത ക്രഷ്-ടിയര്‍-കര്‍ല്‍ രീതിയില്‍ ഇവിടെ തേയില സംസ്‌കരിക്കുന്നത് കാണാന്‍ സാധിക്കും._
_നിങ്ങള്‍ ഒരു ചായ പ്രേമിയാണെങ്കില്‍ ഇവിടുത്തെ ടീ ടേസ്റ്റിംഗ് സെന്ററില്‍ നിന്ന് വ്യത്യസ്ത ഇനം ചായകള്‍ രുചിച്ചു നോക്കാവുന്നതാണ്. ഇഷ്ടപ്പെട്ട രുചി വീട്ടിലെത്തിക്കാന്‍ ആഗ്രഹിക്കുന്നവര്‍ക്ക് ഫാക്ടറിയോട് ചേര്‍ന്നുള്ള ഔട്ട്ലെറ്റില്‍ നിന്ന് തേയില പാക്കറ്റുകളും വാങ്ങാം. ബ്രോക്കണ്‍ ഓറഞ്ച് പെക്കോ (ബിഒപി), ഫ്‌ലവറി ഓറഞ്ച് പെക്കോ (എഫ്ഒപി) എന്നിങ്ങനെ വ്യത്യസ്ത രുചികളിലുള്ള തേയിലകളുണ്ടിവിടെ. ഇത് പാകം ചെയ്യുന്നതിനും ചെറിയ വ്യത്യാസങ്ങള്‍ ഉള്ളതിനാല്‍ അതും വില്‍പനക്കാര്‍ പറഞ്ഞുതരും._
_ഏക്കറുകണക്കിന് വരുന്ന തേയില തോട്ടങ്ങള്‍ സന്ദര്‍ശകര്‍ക്ക് ഒരു അനുഭവമാണ്. തോട്ടങ്ങള്‍ക്കിടയിലൂടെയുള്ള മനോഹരമായ പാതയിലൂടെ അലസമായി നടക്കുന്നത് തന്നെ അവിസ്മരണീയമായ ഒരു അനുഭൂതിയാണ്. കൂടുതല്‍ സാഹസികത ഇഷ്ടപ്പെടുന്നവര്‍ക്ക് ഇവിടയുള്ള ഭയപ്പെടുന്ന തരത്തിലുള്ള കുത്തനെയുള്ളതും ഇടുങ്ങിയതുമായ ചില പാതയിലൂടെ നടക്കാം. ഒരുകാലത്ത് തോട്ടം തൊഴിലാളികള്‍ തേയില കൊളുന്തുകള്‍ താഴെ എത്തിക്കാനും താമസസ്ഥലത്തേക്ക് സാധനങ്ങള്‍ എത്തിക്കാനുമുള്ള ഒരു പാതയായിരുന്നു ഇതെന്ന് കൂടി അറിയുക._
_കൊളുക്കുമലയില്‍ നിന്നുള്ള സൂര്യോദയം ആസ്വാദിക്കേണ്ട ഒരു കാഴ്ച തന്നെയാണ്. 8651 അടി ഉയരമുള്ള മീശപുലിമല, 6988 അടി ഉയരമുള്ള തിപ്പാടമല എന്നീ മലകള്‍ കൊളുക്കുമലയുടെ പ്രാന്തപദേശത്താണ്. കൊളുക്കുമലയിലേക്ക് റോഡ് മാര്‍ഗ്ഗമുള്ള പ്രവേശനം കേരളത്തില്‍ നിന്ന് മാത്രമേയുള്ളൂ. മൂന്നാറിനടുത്തുള്ള സൂര്യനെല്ലി വഴിയാണ് അപ്രോച്ച് റോഡ്. ഒരു തമിഴ്‌നാട് സര്‍ക്കാര്‍ ബസ് പുലര്‍ച്ചെ 4 മണിക്ക് തേനിയില്‍ നിന്ന് സൂര്യനെല്ലിയിലേക്ക് പുറപ്പെടുന്നു. സൂര്യനെല്ലിയിലേക്ക് കെഎസ്ആര്‍ടിസി ബസുകള്‍ പതിവായി ഓടുന്നുണ്ട്._
