ശുചിത്വമില്ലാത്ത ഹോട്ടലുകള്ക്കെതിരെ കര്ശന നടപടി സ്വീകരിക്കുമെന്ന് ആരോഗ്യമന്ത്രി വീണ ജോര്ജ്. ഭക്ഷ്യസുരക്ഷയുടെ കാര്യത്തില് സര്ക്കാര് വീട്ടുവീഴ്ചയില്ലാതെ നടപടി സ്വീകരിക്കുമെന്നും മന്ത്രി പറഞ്ഞു.
ഭക്ഷ്യസുരക്ഷാ പരിശോധനയ് എല്ലാ ജില്ലകളിലും മൊബൈല് ലാബ് സജ്ജമാണ്. ഹോട്ടലുകളെ ഗ്രേഡ് ചെയ്തിട്ടുണ്ടെന്നും മന്ത്രി പറഞ്ഞു .
നല്ല ഭക്ഷണം നാടിന്റെ അവകാശം’ എന്ന കാമ്പയിന്റെ ഭാഗമായി സംസ്ഥാനത്തെ ഹോട്ടലുകള്ക്ക് ഭക്ഷ്യസുരക്ഷാ വകുപ്പ് നേരത്തെ ഹൈജീന് സ്റ്റാര് സര്ട്ടിഫിക്കറ്റ് ലഭ്യമാക്കി തുടങ്ങിയിരുന്നു. ആകെ 673 സ്ഥാപനങ്ങളാണ് ഹൈജീന് സര്ട്ടിഫിക്കറ്റിനായി ഭക്ഷ്യ സുരക്ഷാ വകുപ്പ് തിരഞ്ഞടുത്തത്. സ്റ്റാര് സര്ട്ടിഫിക്കറ്റ് ലഭിച്ച സ്ഥാപനങ്ങളുടെ വിശദാംശങ്ങള് ഭക്ഷ്യ സുരക്ഷാ വകുപ്പിന്റെ വെബ് സൈറ്റില് ലഭ്യമാക്കുന്നതാണ്. ഇതോടൊപ്പം ഭക്ഷ്യ സുരക്ഷാ വകുപ്പ് പുതുതായി സജ്ജമാക്കുന്ന ആപ്പിലൂടെയും തൊട്ടടുത്ത് സര്ട്ടിഫിക്കറ്റുകളുള്ള ഹോട്ടലുകളറിയാന് സാധിക്കും.
പരിശോധനകള്ക്കും നടപടിക്രമങ്ങള്ക്കും ശേഷം ത്രീ സ്റ്റാര് മുതല് ഫൈവ് സ്റ്റാര് വരെയുള്ള റേറ്റിംഗാണ് നല്കുന്നത്.കടകള് വലുതോ ചെറുതോ എന്നതല്ല സുരക്ഷിതമായ ഭക്ഷണവും വൃത്തിയുള്ള സാഹചര്യവുമാണ് വളരെ പ്രധാനം. വൃത്തിയോടൊപ്പം നാല്പ്പതോളം ഭക്ഷ്യ സുരക്ഷാ മാനദണ്ഡങ്ങള് പാലിച്ചാണ് റേറ്റിംഗ് നല്കുന്നത്. ഫൈവ് സ്റ്റാര് റേറ്റിംഗുള്ള സ്ഥാപനങ്ങള് ഗ്രീന് കാറ്ററിയിലും ഫോര് സ്റ്റാര് റേറ്റിംഗുള്ള സ്ഥാപനങ്ങള് ബ്ലൂ കാറ്റഗറിയിലും ത്രീ സ്റ്റാര് റേറ്റിംഗുള്ള സ്ഥാപനങ്ങള് യെല്ലോ കാറ്റഗറിയിലുമാണ് വരിക. ത്രീ സ്റ്റാറിന് താഴെയുള്ളവര്ക്ക് റേറ്റിംഗ് നല്കുന്നതല്ല.
ഓരോ ഹോട്ടലിലും മാനദണ്ഡങ്ങള് കൃത്യമായി പാലിച്ച് റേറ്റിംഗ് ഉയര്ത്താവുന്നതാണ്. ഇതിലൂടെ ഹോട്ടലുകള് തമ്മിലുള്ള ആരോഗ്യകരമായ മത്സരം ഉണ്ടാക്കാനും അവരുടെ കച്ചവടം ഉയര്ത്താനും നല്ല ഭക്ഷണം ഉറപ്പാക്കാനും സാധിക്കുമെന്നും മന്ത്രി പറഞ്ഞു.