എസ്ബിഐയുടെ ബാങ്ക് പണമിടപാടുകൾക്ക് ഇനി മുതൽ ഗ്രീൻ കാർഡ് വേണമെന്ന വാർത്ത കഴിഞ്ഞ കുറച്ച് ദിവസമായി പ്രചരിക്കുന്നുണ്ട്. പണം അക്കൗണ്ടിൽ നിക്ഷേപിക്കാനാണ് ഗ്രീൻ കാർഡ് വേണ്ടതെന്നാണ് ചില മാധ്യമങ്ങൾ റിപ്പോർട്ട് ചെയ്തത്. എന്നാൽ എന്താണ് ഗ്രീൻ കാർഡ് ? യഥാർത്ഥത്തിൽ എസ്ബിഐയിൽ പണം നിക്ഷേപിക്കാൻ ഗ്രീൻ കാർഡ് വേണോ ? എന്താണ് ഗ്രീൻ കാർഡ് ?
സാധാരണ ഡെബിറ്റ് കാർഡിന് സമാനമായുള്ള ഒരു കാർഡാണ് ഗ്രീൻ കാർഡ്. എസ്ബിഐയുടെ ഏത് ബ്രാഞ്ചിൽ നിന്നും 20 രൂപ നിരക്കിൽ ഈ കാർഡ് ലഭിക്കും. ബാങ്കിൽ സ്ഥാപിച്ചിരിക്കുന്ന മണി ഡെപ്പോസിറ്റിംഗ് മെഷീനിൽ ഈ കാർഡ് ഉപയോഗിച്ച് എളുപ്പത്തിൽ പണം നിക്ഷേപിക്കാൻ സാധിക്കും. നമ്മുടെ ബാങ്ക് അക്കൗണ്ട് വിവരങ്ങളെല്ലാം ഈ കാർഡിൽ അടങ്ങിയിരിക്കും എന്നിരിക്കെ ബാങ്ക് വിവരങ്ങൾ രേഖപ്പെടുത്തി സമയം കളയേണ്ട എന്നതാണ് ഈ കാർഡിന്റെ ഉപയോഗം.
എന്നാൽ പണം നിക്ഷേപിക്കുന്നതിന് ഗ്രീൻ കാർഡ് നിർബന്ധമാണോ ? അല്ല എന്ന് എസ്ബിഐ പിആർഒ പറഞ്ഞു. ഗ്രീൻ കാർഡ് ഇല്ലെങ്കിൽ എടിഎം കാർഡ് ആണെങ്കിലും മതി. ഇനി മെഷീൻ ഉപയോഗിക്കാതെ തന്നെ പണം നിക്ഷേപിക്കാൻ സ്ലിപ്പ് പൂരിപ്പിക്കുന്ന പഴയ സമ്പ്രദായം ഇപ്പോഴും ബാങ്കുകളിലുണ്ട്. ആ മാർഗം വഴിയും പണം നിക്ഷേപിക്കാം.